الاحداث اللي حصلت السنة دي فعلا كتيرة وسريعه وفيها كتير اووي من العبر شفت من كام يوم فيديو عاليوتيوب لاخواننا في سوريا ربنا ينصرهم وهي القناصة بتموت فيهم وهما بيقعوا واحد ورا التاني .. الفيديو ده خلاني اقف وقفة مع نفسي حسيت اني لازم اوقفها ارتب افكاري واشوف انا رايح فين وعاوز ايه وحسيت اني لازم اكتب الموضوع ده يمكن افيد حد بيه .. امين يارب
عاوزين نقف وقفة بجد مع نفسينا نشوف احنا فين مش كلام وخلاص, محدش فينا سأل نفسه قبل كده هو ايه اخرة اللي بيعمله يعني في كتير مننا والحمد لله ربنا كارمهم وعندهم كل اللي بيتمنوه والحمد لله علي كل شيء يعني كتير مننا في نعمة والحمد لله بل كلنا في نعمة.
انا عارف انت ممكن تقرا الموضوع ده علي انه موضوع عادي وكأن مفيش حاجة حصلت زي ما اي حاجة بتعدي علينا وبنتجاهلها بس انا هقلك بجد الموضوع ده اللي بيني وبينك فيه عقلك وتفكيرك انت انسان عاقل وتقدر تحكم علي الاشياء مش شوية كلام هما اللي هيخلوك تعمل او متعملش بس احنا ليه بنشوف الحاجة الصح دايما ونبعد عنها هل بنخاف او بنحس ان مش احنا اللي المفروض نعمل كده؟؟
كان ليا زميلتي في الجامعه ولا كان فيها حاجة وكانت ما شاء الله في عز شبابها وفي يوم من الايام لاقيت زميلنا بيكلمني بيقولي دي فلانة توفت دلوقتي والله العظيم مصدقتش ولا تخيلت فلانه اللي مفيهاش اي حاجة اللي لسه شايفها من كام يوم وكانت تقريبا عندها 20 سنه رحمها الله ساعتها بس تذكرت قول الحق (وَمَا تَدْرِي نَفْسٌ مَّاذَا تَكْسِبُ غَدًا وَمَا تَدْرِي نَفْسٌ بِأَيِّ أَرْضٍ تَمُوتُ) اقسم بالله قسم احاسب عليه يوم القيامه ان ده حصل واكيد غير عندي مفاهيم كتير عن فيمة الحياه وخلاني ابص للحياه نظرة مختلفة عن الاول بس الحياة بتنسي الانسان شوية لكن لما حصلت احداث مصر وتونس وليبيا وسوريا وشاركنا في المظاهرات وشفت اللي بيحصل بدئت ترجع لي الذكريات دي تاني ...
بدئت اقول لنفسي انت عارف ان ربنا موجود سبحانه وتعالي ؟ هتقلي طبعا يا عم انت بتقول ايه بس هقولك مهي دي المشكلة كلنا عارفين ان ربنا موجود وشايفنا بس كتير مننا بقوا مش فاهمين او بيحاولوا ميفهموش مش شايفين او بيحاولوا ميشفوش اللي حواليهم ؟ هتقلي ياعم مهي كل الناس عايشة والسلام عيش بقي وربنا كريم وبيغفر وبعدين احنا مبنعملش حاجة غلط اوووي يعني واحنا مسلمين الحمد لله وان شاء الله هنخش الجنة , هقلك طيب الحمد لله كويس انك عارف انك مسلم بس مش جا الوقت اللي تقعد وتفكر مع نفسك انت ماشي صح ولا غلط انت عايش ليه اساسا طيب هقلك حاجة بص في الدنيا من حوليك كده حاول تركز كده شوف الدنيا ماشيه ازاي ؟ كل يوم ناس بتموت ناس انت عارفهم كانوا في يوم من الايام بيتكلموا معاك وبيسلموا عليك وكانوا برده بيحلموا يعملوا ويعملوا في منهم ناس ماتت وهي صغيره وناس ماتت وهي كبيرة وفي وفي طيب انت عارف هتموت امتي ولا هي اماني وخلاص .
كل يوم بتشوف الموتي ومبتعتبرش وكل يوم تسمع العجائب ومبتعتبرش ؟ طب هقلك علي حاجة سيبك من دي كمان انت ايه مشكلتك في الدنيا دي نفسك في ايه عاوز فلوس ؟ طب عاوزها ليه ولا هو طمع وخلاص ؟ عاوز تبقي مشهور ؟ حاجة مش وحشه بس ليه برده ؟ انت عاوز تعمل ايه ؟ طب الناس اللي قبلك دول عملوا ايه ؟ انت فاكر انك عايش لوحدك وانك مش هتموت ؟ والله العظيم هتموت , اللي قبلك ماتوا واللي بعدك برده هيموتوا ؟ الفلوس .... الفلوس دابت والذكريات .... الذكريات ضاعت .. والملك ؟ الملك لله بس مش لحد تاني ؟ الاماني ... اماني ايه بقي انت خليت فيه اماني.
هقلك ليه بس ياعم طب متحاول تعرف انت رايح فين وجاي منين متقف شوية مع نفسك كده مش زي ماهما يروحوا تروح معاهم وزي ماهما يجوا تجي معاهم انت ايه معندكش شخصية ؟ دانتا اعظم مخلوق خلقه ربنا ده ربنا نفخ فيك من روحه وجعلك في احسن تقويم وامر الملائكة تسجد لابيك ادم عاوز ايه تاني ؟ انت غالي اووي عند ربنا بص حواليك كده وبص في التاريخ والماضي مش عيب شوف الناس اللي كانت بتدور علي الفلوس راحت فين واللي كانوا بيدوروا علي الملك حصلهم ايه شوف نجوم هوليود اصحاب المليارات شوف كام واحد بينتحر منهم كل سنه ؟ لا حول ولا قوة الا بالله وده ليه ؟ شوف اسأل نفسك انت .
طب انت نفسك في ايه ؟ طب هقلك علي حاجة حلوة اوووي انت مش عارف ان ربنا موجود وهو علي كل شيء قدير دا انت معاك حل لكل العقد ومعاك حل لكل المشاكل . ربنا سبحانه وتعالي موجود مطلع علينا عارف كل واحد فينا بييسر لينا امورنا حتي واحنا بنعصاه بس مجاش الوقت اللي نرجع فيه لربنا هو في حد فينا هيعيش ولا حد ضامن حتي يعيش لبكره ؟ مجاش الوقت اللي نرجع فيه بقي ونقله يارب سامحنا ويسرلنا امورنا يارب احنا تعبنا من كل المعاصي احنا ضيعين ومشيين لوحدينا في الطريق وانت الكريم , انت فاكر ان ربنا هيرد توبتك لو انت توبت اليه ؟ طب انت خايف تتوب ليه ؟ خايف تقرب من ربنا ليه ؟ اسمع كلام ربنا كده (أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلَا يَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الْأَمَدُ فَقَسَتْ قُلُوبُهُمْ وَكَثِيرٌ مِّنْهُمْ فَاسِقُونَ) الم يأن ان تخشع قلوبنا لذكر الله ....
هو انت فاكر انك لو تبت لربنا مش هتعرف تعيش حياتك لا دنتا فاهم غلط والله ؟ طب اسمع كده ربنا بيقول ايه (وَلَوْ أَنَّ أَهْلَ الْقُرَى آمَنُواْ وَاتَّقَواْ لَفَتَحْنَا عَلَيْهِم بَرَكَاتٍ مِّنَ السَّمَاءِ وَالأَرْضِ) لسه مش فاهم ؟ لسه مش عارف انت عايش ليه ؟ واما هتموت هتروح فين ؟ لسه مش شايف الطريق الصح ؟ هتقلي ياعم انت مش شايف مهو الكل عايش والحياة زي الفل والخير كتير بس متقفلهاش بالله عليك ؟ انت لسه مش فاهم ان دي فتنه
منتا شفت ياما عبر مش انا اللي هقعد اقلك قصص واحكيلك حكايات انت عندك عقلك وتقدر تميز ؟ اقرأ القران ارجع لربنا اعرف انت رايح فين ؟ ادعي ربنا وقله يا رب اهديني . والله صدقني مش هتندم انت بس جرب وحكم عقلك بالله عليك حكم عقلك بس وادعي ربنا من قلبك .
انت انووي بس واصدق التوبه وخليها من قلبك ومن عقلك متخليش حد يأثر عليك انت اعظم مخلوق خلقه ربنا وانت عارف انت رايح فين ..
اصدق التوبة كده اعرف هدفك بالضبط عاوز تعمل ايه ؟ متعديش السنة دي بالله عليك غير متكون رجعت لربنا كده انت متعرفش ده فيه مئات والوفات بيموتوا كل يوم انا مش عاوز اضيقك بس فكر انت بعقلك مش هقلك انا حاجة .
وتبقي كده معلكش ذنوب قلبك صافي وراجع لربنا وتبدأ حياة جديدة تحدد اهدافك وتتوكل علي الله وتتعب وتجتهد وتتوكل علي ربنا في كل شيء واما تلاقي حاجة تغضب ربنا هتعملها تبعد عنها , وعلي طول هتلاقي ربنا فتحلك طريق افضل وتقول ياااه ده ربنا كريم اوووي وتتعرف علي كرم الله وحكمته ورحمته وتشكره علي فضله واما يبتليك ابتلاء تصبر وتشكر وتتعلم وتدعي وتلاقي ربنا كرمك واي ابتلاء اتحول لخير وفضل وربنا يكرمك وتعلم ولادك من بعدك وتربيهم تربية صح بقي وتحفظهم القران وتعيش بالامل اللي بجد وتبقي عارف انت بتعمل ايه . خلي بالك اللي انا قلته ده كله كلام وانت اللي تحكم انت عاوز تعمل ايه في حياتك انا مش هقلك اعمل او متعملش بس الطريق الصح واضح والغلط واضح وانت عارف بس ساعات الشيطان بيبقي مغمي عنينا . خلي بالك ان التقوي والهداية دي رزق كبير اووي وفي النهاية (مَنْ عَمِلَ صَالِحًا فَلِنَفْسِهِ وَمَنْ أَسَاء فَعَلَيْهَا وَمَا رَبُّكَ بِظَلَّامٍ لِّلْعَبِيدِ) وياريت السنة دي تبقي بداية جديدة لينا كلنا ونعيش احلي حياة في طاعة الله .
